Sfuei Mensîl Furlan Indipendent
Archivi de Patrie

Chê altre vuere… la vuere de int çurçuvint: cirint radîs

............

Di agns, ogni Istât, il Circul Culturâl ‘La Dalbide’ di Çurçuvint sot il titul ‘Cirint radîs’ al propon moments di no pierdi, dulà che si tocjin tematichis diferentis leadis aes lidrîs, aes tradizions, ae storie dal paîs e de Cjargne.
La serade di sabide ai 16 di Avost, dedicade a “Chê âte guere… la guere da int”, e varès vût di jessi fate intal lûc indulà che il prin di Lui dal 1916 a àn fusilât cuatri zovins alpins (Silvio Gaetano Ortis, Giovanni Battista Coradazzi, Basilio Matiz e Angelo Primo Massaro) ma, par colpe des matetâts dal timp, la serade e je stade fate te “Cjase da int”.
Si à cjacarât di fats di vuere che no si cjatin scrits tai libris di scuele e cussì, tra testemoneancis, ricuarts, cjants, musichis, imagjins proietadis, i presints a àn podût capî e sintî di dongje cemût che la int e à vivude la vuere.
A son stadis letis testemoneancis ineditis e in particolâr chês tiradis fûr dal diari di une mestre che in chei timps e faseve scuele a Çurçuvint, e dal diari di Vittorio Giovanni Job, zovin di Dieç che al è stât clamât al front indulà che “lis trinceis, in cierts puescj, si distanziavin tra 50 e 60 metris une di chê altre e no coventave alçâ la vôs par che i austriacs nus sintissin. Si jere creât un clime di amicizie: invezit di traisi si scambiavin pan, par lôr che lu vevin contât, cun sigarets. Chescj fats a sucedevin cuant che no jerin presints i uficiâi. Ma alc al è saltât fûr parcè che dopo pôcs dîs a son stâts sostituîts e a scomençarin lis fusiladis”.
Significativis lis testemoneancis di dôs “Puartadoris Cjargnelis”: Caterina Bellina di Cleulis e Anna Nanali Primus di Tamau. De lôr vôs, regjistrade agns fa in ocasion di intervistis fatis de storiche television Video Strega, i presints a àn podût scoltâ di cuant che a lavin al front a puartâ mangjative, cuant che “nus àn mandât fûr dal paîs parcè che no podevin stâ achì parcè che ai vevin cuasi poure che i fossino stâts spions… da Pramôs i vin començât a fâ lis stradis… e là sù i todescs dal Freikofel nus viodevin ca un toc, e alore al ere un sergjent che nus racomandave di tignîsi denti da mont parcè che ogni tant a vignive une palotule… chei biâts soldâts ju ai simpri tal cûr, che ju sintivi vosâ “Mamma mia”. Mi vignive di vaî a sintîju e i ai det ‘cuissà, biadis maris, cetant che lôr a prearan pai fîs e lôr achì a clamavin mari!’”.
Concrete la partecipazion dai zovins Luca B., Alvise N., Kristian S., Massimo S., Nicola S., Luca D. e Celestino I. che a àn invuluçât dut cun musichis e cjants, proponint ancje une lôr leture de vuere personâl e sintude. E je stade une dimostrazion che chê storie, ancje se e podarès someâ un grum lontane de realtât,  no si pues dismenteâ, e soredut che i erôrs fats e lis injustiziis no si àn di ripeti.
Ae fin, il ricuart (cun scrits e testemoneancis filmadis) une vore emozionant dai ultins moments di vite dai cuatri fusilâts, a pene condanâts par no vê ubidît, di un tribunâl straordenari metût in pîts te Plêf di Sant Martin. Pre Toni Beline al scriveve: “Silvio, Tite, Basili e Agnul a son stâts disonorâts di un tribunâl cence dignitât, che al à pierdude ogni autoritât. Un tribunâl disonorât puedial onorâ? Un tribunâl e un sisteme injust puedino fâ justizie? Isal just spietâ onôr e justizie di chei che a àn dimostrât di no savê ce che a son? La int ju à za riscatâts e ju onore. E chest al è impuartant, fondamentâl.”
Une propueste divierse, chê de Dalbide, par invidâ a rifleti e a resonâ, fûr de retoriche, su pe inutilitât des vueris. ❚
Marta Vezzi

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +