Sfuei Mensîl Furlan Indipendent
Archivi de Patrie

La etât dai ASO

............

I vûl fiât, tant fiât. Parcè che nol baste superâ lis provinciis se ce che al ven dopo di lôr nol permetarà di indreçâ il guvier dal teritori. L’assessôr regjonâl Panontin in chescj mês al à butât jù lis liniis vuide de riforme des autonomiis locâls che secont il so intindiment a varan di costruî la gnervadure dal Friûl – VJ di doman. Di une bande mame Regjon (che intant e sta inmaneant cun Rome la rinegoziazion des sôs funzions) di chê altre i fioçs Comuns, inserîts dentri di areis vastis clamadis ASO (Ambits sorecomunâi otimâi) che su determinadis funzions a saran clamâts a fâ ce che fint cumò a stan fasint lis provinciis, su altris si cjaparà in man la gjestion di servizis par cont di plui comuns. La idee di fonde e je juste se il fin al è pardabon chel di eliminâ un passaç di masse te simpri plui insopuartabile burocrazie taliane. Il fat al è che previodi 17 di chescj ASO cemût che al à dissegnât Panontin e somee une menade pal boro. Dome tal Friûl udinês a saressin 9: Cjargne, Glemonat, Val Cjanâl e Cjanâl dal Fier; Tarcentin; Culinâr; Friûl di Mieç; Udin e Hinterland; Cividalês; Çarvignanês e Palmarin; Latisanês. Di fat il coleghe di Zonte Bolzonello al à fat capî che si varès di fermâsi al plui a 11 in dute la Regjon, duncje 4 o 5 in provincie di Udin. Nol è un fat di cjarte gjeografiche ma ben di sostance, come chês che a varessin unions teritoriâls gruessis, duncje plui fuartis. Un altri aspiet fondamentâl, e lu met in lûs ancje une esperte in materie come Elena D’Orlando, docente di dirit regjonâl te Universitât di dal Friûl oltri che membri de Comission Paritetiche Stât-Regjon, e je la cuistion dal sisteme eletîf par chescj gnûfs ents: “Si à di olsâ, gjavant il tabù che par ents di secont grât no si pues vê une elezion direte dal president rispetîf; cjalìn ce che a àn creât par esempli tai Lands todescs o austriacs ma ancje, par stâ plui dongje, te Provincie di Trent: a son rivâts a fâ sielzi ai citadins in maniere direte i lôr rapresentants”. Chest par meti in vuardie che al è inutil fâ agregazions di plui comuns se dopo a vuidâju al è un sindic che al à za i siei ce fâs, cun di plui cence vê un gjeton di presince. Chest al disarà “cui mal fasial fâ” e duncje nol varà chel impegn che si cîr par puartâ indevant un vêr progjet di eficience. Al tornarès a capitâ che cui che al ven indicât a vuidâ la Union al pocarà par fâ i interès dal so comun. “I efiets di razionalizâ i nivei di rapresentance – e spieghe la D’Orlando – a metin devant i “pro” e i “cuintri”: di une bande si poche par vê sparagn, di chê altre si riscje di vê un control democratic che al clope, e chest si sint di plui se a aumentin lis funzions atribuidis al gnûf ent”.
No si à di dismenteâ po dopo che par otignî un mecanisim funzionant tra Regjon e Comuns i vûl inmaneât un sisteme di coordenament e di rêt tra cui che al decît e cui che dopo al à di meti in pratiche. Se no e vignarà fûr dome anarchie e i coscj invezit di calâ a cressaran fûr di misure.
La professore e condivît il principi che la nestre Regjon e je speciâl pal fat di vê plui animis tal so interni, ma cheste specialitât propit par chest e à di jessi fate valê sielzint il miôr model pussibil par chest contest, cence lâ a copiâ chei che magari a vegnin di di fûr. Sperìn duncje che l’assessôr al valuti ben ducj i aspiets prime di aprovâ la leç, no podìn permetisi une altre falope dopo chês provadis tai ultins agns. ❚
✒ David Zanirato

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +