Sfuei Mensîl Furlan Indipendent
Archivi de Patrie

ATUALITÂT – La gnove vuide bilengâl di Remanzâs

............

«Vivi Remanzâs. Vuide ai uficis, ai servizis e aes oportunitâts dal teritori»: chest il titul dal volumut presentât ai 4 di Març stâts li dal Palaç municipâl di Remanzâs. La vuide, par cure di Priscilla De Agostini, e à uns 60 pagjinis e e je di plante fûr bilengâl furlan-talian, insiorade di cetantis fotos a colôrs; l’obietîf al è chel di contâ il paîs e il teritori di Remanzâs furnint al citadin informazions utilis par vivi ad implen i servizis e lis oportunitâts ufiertis de Aministrazion comunâl e des realtâts associativis dal lûc. Cun di plui, si vûl rindi plui sclet l’acès aes informazions e favorî la partecipazion ative di ducj i citadins che cussì a podaran zovâsi des oportunitâts ufiertis ma ancje contribuî di persone a miorâ il lôr teritori.
Jessint bilengâl, la vuide e à chê di jessi un imprest informatîf svelt e eficaç par fâ cognossi a ducj, sedi ai citadins gnûfs che a chei dal lûc, il lôr paîs cun di plui valorizant la lenghe furlane tant che element distintîf de vite dal puest.
La publicazion, realizade in gracie de leç 482/99 pe tutele des minorancis linguistichis storichis, e ven dade fûr a dutis lis fameis di Remanzâs; cui che al è interessât a vêle le cjate li dal Municipi, tal Sportel pe Lenghe Furlane e tal Centri Informezovins.
Ch. Rom.

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +