Resisti par esisti, 20 agns di resistence, interviste a Rem Spicemei dal comitât NO AMX

Di pôc o vin viodût sui gjornâi di chenti, in grande pompe, la iniziative de CRUP e des Frecis Tricolôrs par pandi tes scuelis i “valôrs” che nus svoletin di sore il cjâf: une riedizion moderne e riviodude dai slogans tricolôrs. Ma la domande di fâsi e je se chei valôrs a son nestris e se o vin dome chei. Fevelant di furlans, personalmentri mi vignarès tal cjâf il lavôr, o pûr la multiculturalitât secolâr, il confin e il so contrari. Jo o zonti une storie, un valôr di resistence, piçule tal so no jessi (tant) contade, ma grandonone tal coraç e te sô volontât di tignî dûr, antitesi, par no dî nemesi de iniziative di CRUP e PAN.
Tropis resistencis no sono mai stadis in Friûl pal ben di cheste tiere e de sô int? Tropis storiis no sono mai stadis contadis? O dîs simpri che la storie no contade no esist, parcè che no lasse olme se no inte anime di cui che le à vivude. Cussì o ai gust di contâ une di chestis resistencis, chê dal comitât NO AMX che il mês di Dicembar dal 1993 al cjatà la semence par tacâ a scombati. Jo o jeri pôc plui di fantat, che o sintivi a dî che a Rivolt tante int e leve a protestâ. O domandavi cemût mai, e mi disevin che alì no jerin plui dome lis Frecis, ma ancje i avions AMX fats par distruzi e par copâ, cence compliments. La base di Rivolt in funzion, zontade al maçalizi sanganôs da la ex Jugoslavie. La int dai paîs ator propit no rivave a parâ jù chê gnove e no volude, maledete presince. Alore, biel planc, un trop di int – che di li al cjapà mani il Comitât – al tacà a presidiâ la jentrade da la base, a incuintrâ i aministradôrs, a fâ cognossi ator la situazion. Tancj di lôr a àn ancjemò memorie di chei fats, par vie de tante int che e vignive dongje in chê volte. I zovins di vuê, cuissà, forsit a varan sintût cualchi sunsûr. Tant e tant, a distance di vincj agns al è ancjemò un trop di animis che al seguite a tignî dûr: ogni prime sabide dal mês a son alì a dî il lôr “NO” a chê base simpri operative a servizi cumò des Frecis. Vino di viodi juste l’aspiet pacifist in cheste presince, o isal alc di plui?
Cui che al passe pe Pontebane a ret de jentrade de base il dopo di misdì di chês sabidis, al pues viodi cualchi cristian a tignî sù un strisson che al dîs: No AM (no Aeronautiche Militâr), par vie che dentri di chel cjamp plen di pistis a son i militârs che a trafichin (e che nus costin un voli dal cjâf). Cussì o vin volût sintî un di chei che ancjemò di in chê volte a resistin in cheste testemoneance sabidine.
Rem, tu che za il mês di Dicembar dal 1993 tu jeris achì, puedistu dîmi  cemût mai che si sês metûts adun?
A fâ un tant e je stade la vignude dai AMX che, par altri, si zontave ae presince operative des Frecis, che za di un pieç nus lambicavin, e nus lambichin.
Ce messaç voleviso dâ?
Il nestri obietîf, la nestre brame, e jere chê di cirî di fâ in maniere che la nestre int si ves decidude di alçâ il cjâf in face des prepotencis dai militârs che, dopo dut, a son vignûts lôr a gjavânus la pâs de nestre solite vite paisane, a robânus i nestris dirits ancestrâi.
Trope int si vevie metude dongje?
Un biel numar tal imprin (cuant che, par altri, par cualchi an si cjatavisi li dutis lis sabidis), ma mai avonde par rivâ adore par fâi cuintri, par fâi mudâ idee a cui che al à la fuarce no dal dirit, ma des armis. E, soredut, si vin stufâts masse adore. E, se no si ten dûr…
Ti visistu di cualchi zornade particolâr?
Mi visi di plui di cualchi moment simpatic, come, par esempli, cuant che a àn vût stât chei dal Teatri Inciert a fânus passâ cualchi biel moment cu lis lôr parodiis. Ma, lassant di bande i moments di straviament, o disarai che in chel puest o vin vût ancje biei incuintris cun int vignude di dongje e di lontan par scombati cun nô, a puartânus la lôr solidarietât.
Ce vuelial dî cjatâsi ancjemò dopo 20 agns?
Intant al vûl dî che o sin ancjemò in vite, o intint fisichementri; al vûl dî che, ancje se o sin in pôcs, e scuasit simpri chei, no puedin par mai dî che a son ducj de lôr bande. E po, no crôt di fâ une scuvierte se o dîs che i dirits, la libertât, se a son vêrs e vitâi, tant che i nestris, no àn scjadince.
Ce viodistu pal futûr?
Cheste e je la domande plui dificile, massime parcè che fate a di un che al fâs fadie a stazâ il vuê. A ogni mût, no crôt di dî une putanade disint che l’avignî al è misteriôs e al è tes mans dal Paron dal timp e de storie. Noaltris, dut câs, o fasarìn dal nestri miôr par dâi une man, cirint di tignî dûr, e no dome parcè che lu dîs il Vanzeli, ma ancje par fâ in maniere di no sei condanâts par “omission”.
E, se tu mi permetis ancjemò une batude insom di cheste cjacarade, ti disarai che no mi dismentei mai di ce che mi à vût dit plui di une volte un nestri mestri comun: “Sì, tu fasis ben a scombati par cambiâ il mont, ma, stant che nol è facil che tu puedis rivâ a un tant, contentiti se tu rivis adore di no lassâ che il mont di cambii te”. ❚
✒ Mauro Della Schiava