Abolî lis provinciis? Udin capitâl!

BON LAVÔR
Paolo Fontanelli al è il gnûf president dal Comitat pe autonomie e rilanç dal Friûl, lu à votât ae unanimitât la assemblee de associazion te sô ultime riunion. Al cjape il puest dal professôr D’Aronco, nomenât par aclamazion president onorari. Fontanelli al è stât conseîr regjonâl e al à une lungje militance politiche. Tal prossim numar lu sintarìn par capî in ce maniere che al intint puartâ indenant la bataie dal Comitât. Pal moment o publichìn un so intervent su la cuistion des provinciis furlanis. A Fontanelli l’auguri de Patrie di bon lavôr pal Friûl. ❚ Redazion
________________________________________________
O sin daûr a assisti al inviament dal percors legjislatîf pe abolizion des provinciis, “agnel sacrificâl” sul altâr di un ipotetic sparagn, e a son daûr a vignî sù lis dismenteancis e i disecuilibris che si crearan.
In realtât, il parê di costituzionaliscj autorevui e la opinion esprimude di pôc dal stes Letta a metin i lûs cemût che cun leç ordenarie no si puedi intervignî su lis Provinciis – viodude la Costituzion in vore – e cemût  duncje che e coventi la modificazion de stesse e, pe nestre Regjon, dal Statût, prime – e no dopo – di cualsisedi passaç legjislatîf.
Duncje serietât e volarès che in place Oberdan a Triest si limitassin in câs a une mozion indreçade al Parlament par che al cambi la Costituzion (e il Statût), par dopo cjapânt at e, in maniere prudente, aplicâ lis gnovis normis costituzionâls.
Se di no, o metìn il cjar devant dai bûs, o fasìn i prins de classe a spesis dai furlans cence nuie di concret in cambi e, anzit, cu la sparizion des Provinciis si determinarà intal Friûl Vignesie Julie un disecuilibri “gjeopolitic”, in particolâr cu la pierdite di presince politiche istituzionâl (e duncje di podê) de aree furlane. Il probleme al è daûr a vignî sù cun fuarce, al à riflès pesants sul funzionament e sui coscj di dut il sisteme regjon, e duncje al va cjatât un pont di belançament.
Chest gnûf ecuilibri al podarès, o miôr al scugnarès, jessi dât dal trasferiment de capitâl de Regjon a Udin e la istituzion contemporanie de aree metropolitane (o di une forme aministrative analighe) a Triest.
In chest mût o varìn, infin, une articolazion aministrative regjonâl plui coerente cu la storie, lis carateristichis socioeconomichis e culturâls dai teritoris. Triest al podarès otignî un riordin des competencis aministrativis e urbanistichis cetant che mai necessari par un disvilup de citât, e ancje une definizion obietive des risorsis disponibilis, intant che la aree furlane no varès di indreçâsi a une capitâl ecentriche e vuê ripleade su di se par cjatâ un lûc dulà podê viodi discutudis lis propriis esigjencis.
E par evitâ che Udin al deventi il gnûf Triest, in tiermins di acentrament, si podarès completâ il progjet cu lis riformis de leç eletorâl regjonâl, adotant chê vuê in ûs intes provinciis. Cheste leç e garantìs la governabilitât, la proporzionalitât dai risultâts e, soredut, il leam di ogni elet al propri teritori, midiant dai coleçs uninominâi.
In maniere progressive, il nestri teritori al torne a deventâ, tant che un timp e plui di un timp, lûc di servitût (di chês militârs di memorie no lontane a chês dal passaç di feroviis, autostradis, eletrodots e v.i. dal dì di vuê), espropriât dal propri patrimoni idric e impuarît intal sisteme produtîf.
Forsit e je ore di olsâ gnovis sieltis. ❚
✒ Paolo Fontanelli