Sfuei Mensîl Furlan Indipendent
Archivi de Patrie

IL GRANT LUNARI DAL FRIÛL. Fevrâr

............

RINGRAZIAMENT AL AUTÔR
Su la Patrie di Otubar dal 2013, Zuan Laurin Nardin al recensive “Il grant lunari dal Friûl. Sants, fiestis e tradizions dal cicli dal an” di Mario Martinis. O vin domandât al autôr di proponi a pontadis, mês par mês, cualchi estrat di chest publicazion siore di informazions su lis nestris tradizions e su la nestre storie. Lu ringraziìn pe disponibilitât e pe colaborazion che nus permet di condividi cui nestris letôrs chest grant patrimoni. ❚
✒ Redazion
________________________________________________________________

Vieli Lunari

Fevrâr al è il secont mês dal calendari e il cûr dal Unvier. Il so non al ven dal latin “februare”, che al vûl dî “purificâ”, parcè che tal arcaic calendari roman al jere l’ultim e cussì, par introdusi l’an gnûf, in chel mês si rinovavin diviers rituâi di purificazion (Giunone purificata, Parentali, Lupercali, Dea vesta) che a prontavin pal gnûf cicli dal timp, corispuindint al inizi dal gnûf cicli naturâl e agrari. Il motîf des purificazions pe gnove vite (rapresentade tal senari celest e in chel de nature dal tornâ de lûs simpri plui fuarte par vie dal jevâsi dal soreli tal firmament e il consecuent disveâsi lent de vite) al vignì celebrât par antîc di cetantis religjons, civiltâts e tradizions culturâls.
Il soreli si è jevât di un grum tal cîl e ae metât dal Unvier (“divisori” o “displuvi” de stagjon) al tocje il pont median jenfri il solstizi passât e il prossim ecuinozi de Vierte, lant simpri plui sù ad alt tal cîl e tacant a imprimi un volt ae stagjon e ai cuadris de nature.
Cussì, tal calendari astronomic e in chel popolâr, Fevrâr al ven tignût tant che un mês di passaç dal Unvier ae Vierte e propri par cheste sô carateristiche al ven viodût come un mês di fuarte contradizion climatiche e meteorologjiche. Cun di fat, Fevrâr, se di une bande al somee mantignî dute la crudece de stagjon frede cun glace, nêf e zulugnadis sui paesaçs disfredâts e imobii tal aiar rampit e pluitost frêt, dispès pal prin clip che al puarte, al pant ancje i segns dal disveâsi de nature, tant che lis sôs zornadis a puedin jessi dolcis cuasi che a fossin de Vierte.
Cussì lis aghis a disglacin, lis clevis a son cuviertis di mantei di primulis e violis, çufs di jerbe a vegnin fûr ca e là, i ramaçs a fasin viodi butui simpri plui grues e i vencjârs ju fasin clopâ. Si notin i prins svoi di uciei che si corin daûr inamorâts e sot tiere la vite e scomence a movisi seneose di jessi fûr a viert par lâ incuintri al soreli, tant che ancje i farcs a scomencin a fâ i prins grums di tiere fofe tai cjamps. Il disglaçament e lis ploiis aromai a vegnin filtradis dal vintri cjalt de tiere e a nudrissin lis semencis che, za trasformadis, a tachin a vierzisi, duncje a meti lidrîs e po a menâ.
Fevrâr al è il mês dal Carnevâl, tant che un proverbi calendariâl furlan al dîs: “Nol è Carnevâl che nol sedi fate o no stedi par fâsi la lune di Fevrâr”, o ben Carnevâl nol pues no vê il noviluni di Fevrâr.
Dapardut, tai curtii, di lunc vie pes stradis, ancje tal plui piçul borc dal paîs plui spierdût, une volte si sintive il profum des fritulis che si cueievin te pignate pe gjonde dai fruts, che si vistivin ancje cui peçots butâts in bande e si sfreolavin la muse cul cjarbon par fâ fente di jessi mascarâts e a partivin pe cuestue di puarte in puarte. In dì di vuê al ten dûr ancjemò cualchi Carnevâl ma inmaneât di bande di associazions, che pôc al à a ce fâ cu la grande fieste di une volte, che tes gnots de Joibe e dal Martars gras e cjapave dentri tancj oms e feminis cun cenis, bai, licenziositâts e dispès e jere la ocasion par incuintris plui azardôs te euforie de etât zovine e dal timp prime de Vierte che za al moveve il cûr e i sens. Dispès Fevrâr al siere il Carnevâl cul Miercus de Cinise (che al cole in Març cuant che la Pasche e je alte, o ben cuant che e cole tal mês di Avrîl) che cu lis sôs tradizions religjosis e culinaris di “mieze fieste” di passaç e torne a puartâ la comunitât a un regjm regolâr dal timp e des voris, condusint i fedêi dilunc i cuarante dîs di privazion e di astension fintremai ae grande fieste di Pasche, puarte di jentrade de Vierte. ❚
✒ Mario Martinis

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +