Sfuei Mensîl Furlan Indipendent
Archivi de Patrie

CJARGNE VIVE. Vile, vilans e vilotis cun Lino Straulino li dal Musicalmuseo 2013 di Tumieç

............

Te suaze de rassegne ‘La musiche tra passât, presint e doman’ che si è tignude, tra Mai e Jugn, tal museu ‘Michele Gortani’ di Tumieç sot la direzion artistiche di Alessio Screm, une vore interessant al è stât il contribût di Lino Straulino che al è lat a cirî lis lidrîs de musiche furlane. Il cjantautôr cjargnel nus veve za anticipât alc sul valôr di cheste sô ricercje musicâl sul numar di Març passât (La Patrie dal Friûl n.3/2013 ndr), ma la ocasion e je tornade buine par aprofondî i detais tecnics e storics dal sô lavôr.
“La nestre culture musicâl e je caraterizade di un modul musicâl specific e ancje il test al à lis sôs carateristichis precisis”, al conte il cjantautôr cjargnel. “Jo mi soi interessât di simpri dal componi la musiche leade a chest teritori. Mi soi simpri dit che se no je une lidrîs culturâl par fâ musiche si riscje di fâ buine musiche ma di seconde man. Mi soi imponût te mê culture di cjatâ alc che al puedi  jessi il gno ‘blues’, cirint intai archivis de nestre musiche popolâr chei che a son i elements fondamentâi par creâ e par fâ musiche. Ducj chescj agns, mi soi let i documents e o ai imparât tant. O ai scuviert une struture avonde codificade, baste pensâ aes ripetizions des strofis e al numar precîs di notis che a vegnin dopradis. La scjale des vilotis e je simpri chê: mi-fa-sol-la-si-la-sol-fa-mi, cul finâl si-la-sol-fa-mi. Il concet al è che la struture e lis notis si ripetin simpri. Pari Pellegrino Ernetti, predi esorcist di Vignesie che al à fat un libri su pes vilotis, al è stât il prin a scorporâ lis notis e a scuvierzi che la vôs principâl e finîs sul “mi” e la seconde vôs e finìs sul “do”. Chest al introdûs un concet sempliç: cuale scjale, cuâl mût antîc finissial sul “mi” e al à tant che ambit dal “mi” al “si”? Il mont doric dai grêcs. Lui al jere un studiôs de musiche antighe dai grêcs e romans e fasint cheste analisi al dîs che o sin dentri precisementri dal mont doric antîc dai grêcs. Chest al vierç un mont di considerazions!”
Lino, jenfri une cjantade e chê altre, al cjacare ancje di discjant, il cjant polifonic plui vecjo presint in Europe. “I plui vecjos discjants a son documentâts achì in Friûl, soredut a Cividât. Za tal 1400 cheste tecniche di cjant e vignive doprade soredut in ambient eclesiastic. E jere une forme polifoniche primitive (vuê si cjate inmò vive in Istrie): une vôs e improvisave une melodie su notis altis rispiet aes melodiis principâls, par solit su otavis.”
Al è clâr che ancje lis vilotis a vegnin influençadis di chestis gnovis ariis. Disìn che dut al è in cambiament: viers la fin dal 1800 i grancj musiciscj classics a van a aurî tal cjant popolâr par fâ lis lôr oparis. “Dutis chestis operazions a àn creât une grande dificoltât: e je lade pierdude la celule principâl, la essence de musiche. Jo mi soi cjatât a 20-30-40 agns a cirî di capî se al è ancje achì il gno blues. O ai scugnût lâ in dues a dutis chestis robis par cjatâ alc. Chest al è un mont che al devente interessant soredut par cui che al vûl componi. Jo o ai provât a fâ. La forme dal test e je di 4 strofis. Il cjant furlan al à 4 viers: plan, tronc, plan, tronc. Cuatri riis e vonde. Il cjant al è une cuartine uniche di ‘viers otonâi’. Lis vilotis a son dutis cussì. Il prin viers si ripet par trê voltis e al siere cul secont viers.”
Il cjant fin a pôcs agns indaûr al veve une funzion fondamentâl: chê dal ‘consolâmi me’. Lino al dîs “Lavorâ cjantant ti permeteve di solevâti dal lavôr. Il cjant e jere la droghe che e permeteve a cheste int di tirâ indevant une esistence no facile”. Ve alore parcè che al è impuartant lâ a cirî il contat diret cu la origjin de musiche dal to teritori. Al è come un ‘tornâ a cjase’ par capî che al esist ancje chest maraveôs e, par tancj aspiets, ‘unic’ mont. ❚
✒ Marta Vezzi

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +